នៅព្រឹក​​ថ្ងៃអង្គារ ១៥រោច ខែកត្តិក ឆ្នាំថោះ បញ្ចស័ក ព.ស ២៥៦៧ ត្រូវនឹងថ្ងៃទី១២ ខែធ្នូ ឆ្នាំ២០២៣​នាសាលប្រជុំរំដួល នៅទីស្តីការក្រសួង​ធនធានទឹក និងឧតុនិយម​ ក្បាលថ្នល់​ ឯកឧត្តម ចាន់ យុត្ថា រដ្ឋលេខាធិការ​ និង​ជា​នាយកកម្មវិធី WAT4CAM ជាសហប្រធាន​ បានដឹកនាំ​កិច្ចប្រជុំ​​ត្រៀម​ចាប់​ផ្តើម​អនុវត្ត​គម្រោង​ (Kick-off meeting) ជាមួយលោក Matthieu Le Grix ប្រធាន​​នាយកដ្ឋាន​ទទួល​បន្ទុក​កសិកម្ម អភិវឌ្ឍន៍ជនបទ និង​ជីវៈចម្រុះ ប្រធានក្រុម​បេសកកម្មបារាំង​មក​ពី​​ទីក្រុងប៉ារីស។

សូមជម្រាបថា​ កិច្ចប្រជុំនេះមានការចូលរួមពី​លោក​ស្រី Sandrin BOUCHER នាយិកា​ទីភ្នាក់ងារ​បារាំង​សម្រាប់​ការអភិវឌ្ឍ(AFD) ប្រចាំកម្ពុជា តំណាងសហគមន៍អឺរ៉ុប តំណាងក្រសួងកសិកម្ម រុក្ខាប្រមាញ់ និងនេសាទ ប្រធានមន្ទីរធនធានទឹក និងឧតុនិយមខេត្ត​បាត់ដំបង ខេត្តសៀមរាប ខេត្តព្រះវិហារ ខេត្តកំពង់ធំ និងខេត្តកណ្តាល និងទីប្រឹក្សាបច្ចេកទេសជាតិ-អន្តរជាតិ​របស់កម្មវិធី WAT4CAM មាន​ដូចជា TA-INFRA, TA-ISWM, TA-AGRI, CIRAD, IOWATER និងក្រុមការងារកម្មវិធី PMU-WAT4CAM សរុប​ចំនួន​ ៤៤នាក់។

ឯកឧត្តមរដ្ឋលេខាធិការបានឱ្យដឹងថា​ កិច្ចប្រជុំបច្ចេកទេសជាមួយ​ក្រុមបេសកកម្មបារាំងនាពេលនេះ​​ ​ដើម្បី​ពិនិត្យ​វាយតម្លៃពី​វឌ្ឍនភាពនៃការ​អនុវត្តកម្មវិធី​WAT4CAM ព្រមទាំងបញ្ហាប្រឈមនានា និងពិភាក្សាពី​ផែនការបន្ទាប់។​

ក្នុងកិច្ចប្រជុំនេះ​ ក្រុមបេសកកម្មបារាំងបានស្នើសុំបួនចំណុច​៖

១)​​ ពន្លឿនការងារការសាងសង់រចនាសម្ព័ន្ធដែលបានសិក្សាហើយ

២) ជំរុញ​ការដោះស្រាយផលប៉ះពាល់ និងការលើកកម្ពស់ការការពារបរិស្ថាន និងសុវត្ថិភាពសង្គម

៣)​ ជំរុញការរៀបចំ​ និងបណ្តុះបណ្តាលសហគមន៍កសិករប្រើប្រាស់ទឹក និងការរៀបចំនីតិវិធីផ្សេងៗ

៤)​ ជំរុញ​ការងារការផ្សព្វផ្សាយ និងការបណ្តុះបណ្តាលបច្ចេកទេសកសិកម្ម និងការដាំដុះ។

ជាមួយគ្នានេះ​ដែរ​ ក្រុមការងារបេសកកម្មបារាំង​ក៏បានវាយតម្លៃខ្ពស់​ និងបាន​ថ្លែងនូវការ​កោតសរសើរ​ដល់​ក្រុម​ការងារ​អនុវត្ត​កម្មវិធី​​ រួមទាំងក្រុមទីប្រឹក្សាបច្ចេកទេស ដែលបានអនុវត្តប្រកបដោយប្រសិទ្ធភាព និង​ឆ្លើយ​តបបាន​តាម​កាលវិភាគ បើ​ទោះបី​ជាមានបញ្ហាប្រឈមខ្លះៗ ដែលត្រូវបន្តពិភាក្សា និងដោះស្រាយ៕